Skip to content

Збирката раскази „Класифицирано“ од Лилјана Пандева ќе биде промовирана во МКЦ

Во МКЦ на 13 октомври (вторник) од 19 часот ќе се одржи промоција на збирката раскази „Класифицирано“ од Лилјана Пандева.

Промотор е Снежана Стојчевска, додека Јулијана Величковска е модератор.

Ѓоко Здравески вели дека во своите раскази, преку раскажување обични, секојдневни приказни, Пандева навлегува длабоко во психологијата на меѓучовечките односи.

„Таа успева, низ јасен и едноставен јазичен израз, од навидум мали теми да создаде приказни што го прикажуваат внатрешниот конфликт на ликовите, нивните заплеткани и често лажни односи. Сето тоа е зачинето со суптилен хумор, не за сечии очи видлив, кој знае да ја очуди приказната и да ја одвои од реалистичниот дискурс во кој е првично поставена. (…) Расказите во „Класифицирано“ раскажуваат приказни за обичниот човек, терен во книжевноста за кој е потребен талент за минималистички и ненаметлив израз. Пандева одлично се снаоѓа на овој лизгав терен на кој многумина автори паѓаат не сфаќајќи ја докрај мајсторијата на едноставноста, празнината и отсуството на авторот од приказната. Токму поради оваа своја умешност Лилјана Пандева успева да создаде полифоничен ракопис во кој нејзините раскажувачи се ослободени од бремето на реалниот автор, овозможувајќи им на тој начин да постојат засебно во светот на фикцијата“, вели Здравески.

Лилјана Пандева е родена во 1964 година во Ново Село, Струмица. Таа е дипломиран професор по литература и македонски јазик и доктор по филолошки науки.

Нејзини досега објавени дела се: драмолетите за деца „Новогодишни едночинки“; расказите „Канцелариски колумни“; стихозбирката „Љубов од А до Ш и обратно“; романите „Од агендата на Калина Калин“, „Возовите на Луцерн“, „Доилката“ (добитник на наградата „Стале Попов“) и „Дневници на една љубов“. Нејзините дела се преведени на германски, на српски и на руски јазик.

Извор

Напишете коментар