Литература Македонска поезија Поезија

Денови – Коста Рацин

Честит 1 мај – Меѓународниот ден на трудот!

Ви го честитам со песната „Денови“ симбол на аргатската мака, на тешкиот живот на македонскиот народ, песна проткаена со социјални мотиви. За жал и денес сме сведоци на сите овие работнички маки од кои како да не постои излез. Да ја подигнеме свеста на повисоко ниво и да се бориме за правата на работниците и на секој човек, зошто сите сме важни!

Денови

Како на вратот ѓердани
ниски камења студени,
така на плешки денови
легнале та натежнале

Денови ли се — денови
аргатски маки големи!

Стани си утре порано
дојди си вечер подоцна,
наутро радост понеси
навечер тага донеси —

ај пуст да е, пуст да би
останал живот кучешки!

Роди се човек — роб биди
роди се човек — скот умри
скотски цел живот работи
за други, туѓи имоти.

За туѓи бели дворови,
копај си црни гробови!

За себе само ’ргај си
за себе маки тргај си —
нижи си ѓердан денови
нижи си алки ковани,

нижи си синџир железен
околу вратот навезен!

Слични написи

Напишете коментар

Вашата адреса за е-пошта нема да биде објавена. Задолжителните полиња се означени со *

Крајбрежје