Сонуван живот – Илија Карајанов

Кога крвта се римува

со ноќна мора

Кога дишењето се римува

со плима и осека

Кога Морето се римува

со освоеното време

Кога „сребрената душа“

се римува со „отворената рана“

Јас знам дека

тоа не е песна.

Не е иста вистината

во првото Утро

и познато Пладне

а само Времето знае

која Ноќ последна ќе биде

Кога компасот покажува

колку сме далеку

од Светото писмо

колку ѕидови и граници

во нас се креваат

Кога памтењето се римува

со камбани, миси и псалми

Кога крварат стиховите

Заробени во сонот

Јас знам дека

тоа не е песна

туку СОНУВАН ЖИВОТ

Извадок од збирката Граници во сонот (2017), од Илија Карајанов

close

Дали сакаш во твоето сандаче да стигнуваат
најпосетуваните статии на блогот
на крајот од секоја недела?