Избор песни: Април ко да не бил – Јосип Коцев

Си оди април ко да не бил,
со легија мириси невдишани
и цело царство неба недоносени,
низ цутови во снежна лулка разнишани,
врз пладниња во самраци нанижани.

Си оди април ко да не бил,
учител по самотија во празни училници,
собирач на ехо во тивки исповедалници,
дарежлив продавач на маски и далечини,
строг татко на немири и болештини.

Си оди април ко да не бил,
в четврток што е сабота,
во утро што е исто така и квечерина,
со лекот што чини пет пари,
и можеби уште само пет допири.

Си оди април ко да не бил,
а ние сме овде, ко што бевме:
далечни за два света
и за уште цели нови два метра.

 

close

Впиши го војот емаил ако сакаш да станеш дел од нашата блог заедница на читатели!