Бетелгез — ѕвезден археоптерикс, ѕвезда-фосил
што меѓу рогатите животни паниката ја шири.
Удавеникот на кој небесното море главата му ја носи
и ја тркала по песокот среде темниот прилив.
Антарес — отровна ѕвезда, осило зад тилот,
вжештена смрт што дреме во скорпииниот опаш.
Крилат еднорог што со бодливото крило
по решетките на небесниот кафез тропа.
Денебала — црн пришт врз машкоста на лавот,
жива рана во која лута сол се гнезди.
Ѕвезди што дење се животни среде калта и правот,
животни што навечер се претвораат во ѕвезди.
![](https://i0.wp.com/krajbrezje.mk/wp-content/uploads/2021/03/thumbnail_FB_IMG_1617049647286.jpg?resize=100%2C100&ssl=1)
Вечен вљубеник во хаосот, сопствената инспирација и сѐ она што површински не може да се види.