Михај Еминеску (романски: Mihai Eminescu), роден Михаил Еминович (15 јануари 1850 – 15 јуни 1889) – романски поет, писател и новинар, често именуван како најпознат и највлијателен романски поет. Еминеску бил активен член на книжевното друштво Жунимеа и работел како уредник за списанието Тимпул, официјален гласник на Конзервативната партија на Романија. Неговите први објавени песни биле на возраст од 16 години. Според голем број романски историчари, меѓу кои и Никола Јорга, Еминеску е најголем романски поет.
Поезијата на Еминеску е со различна тематика, од природа до љубов, од омраза до социјална критика. Преведена е на над 60 јазика. Неговите дела имале силно влијание врз романската култура. Годинава се навршуваат 173 години од неговата смрт. Во негова чест ја објавуваме неговата песна Што ти посакувам јас тебе, слатка Романија. Уживајте во неговите стихови.
Што ти посакувам јас тебе, слатка Романија?
Што ти посакувам јас тебе, слатка Романија,
Мојата земја на слава, земја на копнеж?
Силни раце, моќно оружје,
На славното минато, голема иднина!
Виното во чаши нека зоврива, пехарите нека пенат,
Ако синовите твои горди тоа го сакаат;
И карпата да остане, ако бранот згасне,
Романија слатка, тоа јас ти го посакувам.
Сон за одмазда како гробот црн
Од непријателска крв мечот твој чади,
А хидра од ветрот трепери
Сонот твој за слава гордо триумфира,
Тробојни знамиња низ цел свет да раскажат,
Колку е голем романскиот народ,
Кога чист пламен со светост ќе се запали,
Романија слатка, тоа јас ти го посакувам.
Ангелот на љубовта, ангелот на мирот,
На олтарот на Веста тајно се смешка,
Тој кој со сјајот свој Марс го заслепи,
Кога со светилка лета и светот го осветлува,
На градата твоја девствена тој се симнува,
Среќата од небесниот рај вкуси ја,
Во прегратка држи го, изгради олтар за него,
Романија слатка, тоа јас ти го посакувам.
Што ти посакувам јас тебе, Романија слатка,
Млада невеста, љубовна мајко!
Синовите твои во братска љубов да живеат
Како ѕвездите ноќни, како зорите денски,
Да живееш вечно, во слава и радост,
Силно оружје, романска душа,
Сон за храброст, слава и гордост,
Слатка Романија, јас тоа ти го посакувам!
Вљубеник во книжевноста кој верува во светлината на зборот и на љубовта.