Душава е

 

Душава ми е океан

во кој бескрајно пловат

сите радости и таги,

каде се потонати сите надежи

што ми е страв гласно

да ги изговорам.

Очекувањата водат кон цунами

сведени се на минимум,

овозможуваат да пливаме

по мирна вода без бранови

за да не се удавиме

ниту исплашиме.

Душава ми е небо

на кое милион ѕвезди трепкаат,

меѓу нив најсилно свети мојата

што ми го осветлува патот,

таа е моја водилка,

што ќе блеска вечно.

Душава ми е виножито,

кога сонце се смее и небо плаче

во неа се прегрнуваат моите ангели

заедно со демоните

и започнуваат меѓусебен танц

кревајќи шарени знаменца.

Душава ми е градина

засадена со цвеќиња и билки,

по нивниот мирис ќе ја препознаеш

во неа ќе се пронајдеш и осознаеш,

оти не дозволувам да овене

тоа што цвета во мене.

close

Дали сакаш во твоето сандаче да стигнуваат
најпосетуваните статии на блогот
на крајот од секоја недела?