Во светот на книгите Занимливости и информации Литература

Реакција на издавачите – бараат ревизија на годишниот конкурс за финансирање проекти во културата

Според Македонската асоцијација на издавачи, при доделувањето на средствата на Министерството за култура се фаворизираат проекти на албански јазик, на физички лица и на правни субјекти на кои издаваштвото не им е основна дејност.

Македонска асоцијација на издавачи (МАИ) изразува општо незадоволство од резултатите од годишниот конкурс на Министерството за култура за финансирање проекти од национален интерес во културата, од областа на литературата и издавачката дејност.

МАИ посочува неколку најголеми слабости при доделувањето на средствата од годинешниот конкурс:

Постои разлика во одобрените средства кај различни проекти и очигледно е фаворизирањето на проектите на албански јазик кои, во просек, имаат добиено по 25.000 денари плус во однос на проектите на македонски јазик;

Повеќе од 20 отсто од проектите се на физички лица. Ова, велат од МАИ, е особено загрижувачки затоа што станува збор за навистина голем број вакви изданија.

„Сепак, издавачите се тие што располагаат со капацитети за издавачка дејност и доделувањето проекти на физички лица треба да биде исклучок, а не правило, имајќи предвид дека поради немањето капацитети за реализација на овие изданија и за нивна дистрибуција, потоа никој не знае ниту како изгледаат, ниту каде завршуваат. Едноставно, ги нема во книжарската продажна мрежа и сомнежите за злоупотреба и манипулации со средствата се навистина основани“, се наведува во реакцијата на МАИ.

Особено е често појавувањето на печатници и на други правни лица чија основна дејност не е издавање книги, кои добиле средства за реализација на проекти од годишниот конкурс. На тој начин, како што се посочува, тие се изедначуваат со издавачите, иако немаат ниту редакција, ниту дистрибуција, ниту книжарници.

Ставот на МАИ е дека за доделените средства недостигаат критериуми за оценување на важноста и големината на проектите. Така, одобрени се исти средства за проекти кои се целосно различни според техничките параметри.

„Исто така, пречи и дискрециското право на министерот и на неговиот кабинет во завршната одлука за доделување на средствата, со што улогата на комисиите се маргинализира, а се зголемува можноста за манипулации и, секако, за сомнежи дека тие се случуваат. МАИ сака да изрази жалење за состојбата во која се втурнува македонското издаваштво и надеж дека Министерството за култура ќе ги послуша реакциите на културната јавност и на нашето здружение и ќе направи ревизија на одобрените проекти и, особено, на одобрените средства за проектите,“ се нагласува во реакцијата на МАИ.

Извор

Similar Posts

Напишете коментар

Вашата адреса за е-пошта нема да биде објавена. Задолжителните полиња се означени со *

WP Twitter Auto Publish Powered By : XYZScripts.com
Крајбрежје