Непребол – Благица Ангеловска

(На мајка ми)

Непрежалена си ми ти,

непребол недогледен ти си ми,

недоречен, таговен и проклет,

едвај искажан низ годиниве редум,

зашто и зборовите в срам молчат

пред горкото признание

дека во нив тагата моја,

воздиви што ми распарува

и здивот напати ми го сопре,

не умеат во себе неа да ја вткаат

та да може мене да ме разберат,

од тагава трошка да ми оздрават,

а и ти прегрната со земјата каллива

и вреливе солзи врз студената плоча

мене душата да ми ја разбереш

и утеха мајчинска, стварна да ми дадеш,

зошто не можам сама да те одболедувам

и на други да те прераскажувам

неизрадувана ти за мене и јас за тебе

по вечното заминување.

Благица Ангеловска

close

Дали сакаш во твоето сандаче да стигнуваат
најпосетуваните статии на блогот
на крајот од секоја недела?