Поезија за деца: „Ехо“ од Петре М. Андреевски

Денеска, како избор за најмалите ја имаме песната „Ехо“ од македонскиот писател и поет, Петре М. Андреевски. Интересна песничка за гласот кој се враќа и со себе носи многу други убавини. Што е ехото и што тоа им носи на поетот и читателите, прочитајте подолу.

Еднаш викнав од високо
и гласот два-трипати
одзад ридот и шумата
назад ми се врати.

И заедно со гласот
оттаму се врати
и ветрот кој водата
во реката ја мати.

И ја видов тогаш
онаа танка црта
од наглувата земја
и семињата што ‘ртат.

И видов како огнот
и барутот земна,
притаено, скришум,
во заседа се демнат.

И видов јасените
колку јасно дишат
кога сонце навалено
на врвот им се ниша.

И видов како шеќерчиња
јаготката збира
и како сама малината
преточува шира.

И видов колку, каде
во гласот мој е блиску
она што е високо
и она што е ниско.

И видов како може
сегде да се стаса,
но не видов како, како
ми се врати гласот.

close

Впиши го твојот емаил ако сакаш да станеш дел од нашата блог заедница на читатели