На 12 декември во спомен-собата на Миладиновци во Градската библиотека „Браќа Миладиновци“-Скопје во 19 часот ќе биде промовирана најновата, трета по ред стихозбирка “Патот на водата„ на авторката Гордана Каракашевска. Поетската книга „Патот на водата“ е длабоко исконско емотивно патување, таа е автобиографска мапа каде земајќи ја водата како појдовна точка, поетесата навлегува во нејзината симболика и преку неа ја пресликува својата духовна состојба.
Книгата е инспирирана од Охрид, Охридското езеро, Струга и реката Црн Дрим, сите песни се настанати токму таму и токму затоа е и посветена на нив.
Промотор на книгата ќе биде професор Вања Таневски, а стихови ќе чита поетесата Катерина Гогова.
Книгата финансиски е помогната од Министерството за култура на Македонија, а издавач е Современост.
Во земјата на водата
Дете, ене ја реката.
Она наросено огледало во кое се огледува светот.
Погледни!
Нејзината вода е стакло врамено во сребрена рамка.
Во него се огледува мостот
и новата вегетација никната во пролет.
Не залудно свети сонцето
-гледа во нас.
Водата бесшумно гргори.
Ништо не е безбедно од нејзиниот налет.
Облакот сребрен ни е в око,
но замина, реката го зеде.
Под мостот спијат чуварите на темнината.
Далечни дразби вијат и не плашат,
но запомни, цвеќињата не паметат.
Над нашите глави
времето си минува како ништо да не се случува.
Во налетот на водата
реката како зора ќе распука
А ти, гранче си, утринско стебло.
Вљубеник во книжевноста кој верува во светлината на зборот и на љубовта.