Македонска поезија Поезија

Љубов – Ацо Шопов

Очи ти сакам, молња да режат,
кипнати гради оган да горат,
врели ти усни жар да се сторат,
под твоите раце
под твојата сила,
врагој да мрзнат
и да се ежат,
другарко моја другарко мила!

Не за љубовни песни ти пеам,
не за вечери неспани тлеам,
оваа песна за бунт ти збори,
во неа крвта моја гори!

Таму –
кај пламен народен пламти,
и пушки грмат
кај борци з зори јасни
за живот
во смрт без жалба минат –
другарко, таму љубовта расне!

Сред тие бури,
в планини сури,
другарко моја, другарко златна,
прва да идеш,
прва да бидеш,
а ако куршум
младост ти зграби,
немој да тажиш,
немој да жалиш –
огнени очи не ќе ти свенат –
илјада срца со жар ќе палиш,
илјада борци во борба ќе кренат.

Очи ти сакам, молња да режат,
кипнати гради оган да горат,
врели ти усни жар да се сторат,
под твоите раце
под твојата сила,
врагој да мрзнат
и да се ежат,
другарко моја другарко мила!

Aцо Шопов

Similar Posts

One thought on “Љубов – Ацо Шопов

Напишете коментар

Вашата адреса за е-пошта нема да биде објавена. Задолжителните полиња се означени со *

WP Twitter Auto Publish Powered By : XYZScripts.com
Крајбрежје