Skip to content

Приказни за деца: „Последната Ластовичка“ – Ненад Џамбазов

Од Земјата на лажговците (1999)

Ластовичките одамна полетаа на југ. Времето се промени. Почна да дува студен ветер. Лисјата на гранките одамна капнаа на земјата. Сланата ги попари тревките и цвеќињата. Децата почнаа да
носат топла облека.
Но една ластовичка сѐ уште не одлета во јужниот крај. Некое лошо дете со воздушна пушка ѝ го скрши крилото. Кутрата таа! Колку тагуваше што не можеше да лета. По стопати на ден се обидуваше да ги рашири крилјата, но попусто. Ранетото крило ѝ тежеше повеќе од олово. Колку тажни солзи пророни, колку тажни воздишки испушти по своите одамна заминати другари.
– Што да правам-се праша?! -Не можам да летам и не можам ниту да најдам храна за себе. Ќе смрзнам на овој студ, а никој нема да ми помогне.
-Оф, тешко мене! Јас сум најнесреќната ластовичка на светот!
Небото истури студен пороен дожд. Ветерот корнеше дрвја и носеше сè пред себе. И маглата веќе зацарува по патиштата и шумата. Прст пред очи не се гледаше. А ластовичката смрзната и покисната од дождот лежеше на земјата. Ранетото крило ѝ пречеше да се засолни во своето гнездо
– Готово е со мене, низ солзи прошепоти последната ластовичка. -Најмногу жалам што не ќе можам на пролет да ги зарадувам децата како предвесник на пролетта. Да ја зацрцорам својата пролетна песна. И кога веќе мислеше дека ѝ нема спас, едно овчарче барајќи ја својата загубена овца, случајно ја најде ластовичката.
– Ова е навистина чудо!, рече малото овчарче – Зошто си тука? Твоите пријателки одамна одлетаа во јужните краишта.
Ластовичката да можеше да зборува, ќе му раскажеше за сите маки што го доживеа.
Овчарчето беше умно и веднаш ја разбра нејзината мака. Ја крена нежно во своите дланки. Крилото тешко ти е повредено, рече со тага во гласот. -Но не грижи се мила, ластовичке! Јас ќе ти помогнам. Ќе те лекувам и ќе те хранам што побргу да оздравиш. А на пролет пак со твоите пријателки ќе летате и ќе се радувате на пролетта.

Фото: ScaleArtandGraphics

Прочитајте и „Езоп за деца: „Малото Ракче и мајка му“ – Поучна басна“.

Напишете коментар